Rom 5 | GAM | STEP | Nono pillgi djipin al ge God nale al nono wambo naparo, kiwa mormon we dji. Embe yei pille nono God boll djelldjell mopin ba nono Iwa Kerman Jisas Krais kogo yei al nono wo er taimane pupin.

Romans 5

Nono Krais boll aike gopin, une boll aike gun mormon

God nale al nono wambo naparo, kiwa mormon

1 Nono pillgi djipin al ge God nale al nono wambo naparo, kiwa mormon we dji. Embe yei pille nono God boll djelldjell mopin ba nono Iwa Kerman Jisas Krais kogo yei al nono wo er taimane pupin. 2 Krais nono kondwe yapro awi, God nono wandill golo awi me ge al, nono pillgi dje er pakna po mormon. Alla nono God boll aike kupill al po mopon ege ge, nono wo pille kui yenmon.

3 Alla urup wonda ge nono wo pupon eri. Ge nono to gi dje aundaka, kake pa molo bon dje wonda. 4 Iwana dongall mopin dal, imb ta wonda ba nono kulnab nayagbon, aglo gi dje pa mopon. Nono aglo gi djimbon al ge, God wo nono kaima inda dje pille kui ye mopon. 5 Alla nono kui ye mopon ge kiwa nayembon, man. God yene Murble dje wori nono boll puka toi pille, nono kanmon, God nono wopake kaima kando.

6 Kando ge, nonekne amblo pille djimbon dje yepin man pai poke ge, God dje wori Krais wo nono singare ke yepin una pille goi. 7 Una yene age wopake ta pille nagoya. Alla, age wopake uro ta moya ge yene age kane, na une pille goyo we djinda manda? 8 Ba nono singare ke ye pa mopin poke, Krais wo nono pille goi. Goi al ge, God ombine dje awi kanmon, une nono wopake kando. 9 Alla Krais golo meyamye toi al ge, nono God nale al wambo naparo, kiwa mormon. Ge pille, God una elle kumbso awo tonda poke ge, nono er take dje nambon, une nono i yem djinda, natonda. 10 Nono God boll kunda yemyem mopin ba yene warye goi al ge, nono i taimane wori. Wori al ge wal kerman paro. Alla, i taimane wori mormon ge, une iwa gun moro pille, nono er take dje nambon, une i yem djinda. Djinda al ge wal kerman plakill paro. 11 Plakill paro mal embe, asa nono God boll djelldjell mopin ba nono Iwa Kerman Jisas Krais wo amblo i taimane wori al ge, nono God boll wopake pirmon.

Gor me ge Adam yei, alla una gun mor me ge, Jisas yei

12 Nono kanmon, iwa taimanta ke yei al ge, makimb una porapora singare ke yei. Iwa ge ke yei al ge ipon una gor. Alla una porapora gor ge, singare ke yei pille gor. 13 Ge asa Mosis lo napai poke ge, una makimb al djingjang ye moi ba lo napai pille, God tano dje nakani. 14 Adam molo wo Mosis moi poke ge, goi me yembe yeika una golo woi. Ga Adam singare ke taimane yei mal embe nayei ba, goi me yeika ga para goi. Ge una are wonda iwa ge, Adam su mal moi. Ba 15 Adam singare ke yei mal ge ne, God nono wandill golo awi mal ge me taimane napai, soka djelldjell pai. Ta ge, Adam yeika, una porapora goi ba, me ta pa er plakill pi. Ge God wandill golo awika, una merke wopake moi. Jisas Krais wandill golo wal gorwulle awi al ge, una merke wopake moi. 16 Ba God nono wandill golo aundo mal embe ge ne, Adam singare ke yei mal ge soka singare djelldjell kaima yepill. Ta yeika God nale al nono wambo paika, tonda mal mopin ba alla, ta wandill golo awika una singare ke merke yei ge God nale al wambo napai, kiwa moi. 17 Iwa taimane ale yei al ge goi me yembe yeika una porapora golo pa moi. Ba alla God molo pla pi. Yene wandill golo awi al nono God nale al wambo naparo, kiwa mormon una, nono Jisas Krais taimane yei al ge, goi me kamblo kal woro, king mal embe gun molo pambon.

18 Embe yei pille iwa taimane ta ale yei al ge, God nale al una porapora wambo pai, tonda mal moi ba, iwa ta singare wopake yei al ge, God nale al una porapora wambo napanda, kiwa molo gun moye. 19 Iwa taimanta God kandjiye to wori al ge una merke singare ke yei. Alla, iwa ta God kandjiye ye kune yei al ge, una merke God nale al wambo napanda, kiwa moye. 20 Mosis lo dje awi ge, una singare ke yenj ge kane kune yene dje, dje awi. Ba una singare ke ye pa moi al ge, God wandill golo awi ge pa er plakill pi. 21 Singare ke me ge yembe yeika una golo woi. Ba, God wandill golo awi me ge, yembe yeika nono Iwa Kerman Jisas Krais ye worika, God nale al nono wambo napanda, gun molo pambon.